Yahia

أريد أن أخرج مع إمرأه غير زوجتي

2008-05-03T03:23:00.000-07:00

أنا مش من طبعي أني اجيب حاجات او مواقف مكتوبه قبل كده واعرضها عشان انا شخصياً أفضل التجربة الشخصية والإنسانية الذاتيه هي اللي تتكلم عن نفسها ، بس فعلا الموضوع ده عجبني جداً فأحببت أني اشارككم فيه

قصة قصيرة لكن رائعة وهادفة جداً وأتمنى أن تعجبك
((( بدأت أخرج مع امرأة غير زوجتي )))

بعد 21 سنة من زواجي, وجدت بريقاً جديداً من الحب . قبل فترة بدأت أخرج مع امرأة غير زوجتي, وكانت فكرة زوجتي حيث بادرتني بقولها: 'أعلم جيداً كم تحبها'... المرأة التي أرادت زوجتي ان أخرج معها وأقضي وقتاً معها كانت أمي التي ترملت منذ 19 سنة, ولكن مشاغل العمل وحياتي اليومية 3 أطفال ومسؤوليات جعلتني لا أزورها إلا نادراً.في يوم اتصلت بها ودعوتها إلى العشاء سألتني: 'هل أنت بخير ؟ ' لأنها غير معتادة على مكالمات متأخرة نوعاً ما وتقلق. فقلت لها: 'نعم أنا ممتاز ولكني أريد أن أقضي وقت معك يا أمي '. قالت: 'نحن فقط؟ ! ' فكرت قليلاً ثم قالت: 'أحب ذلك كثيراً'.

في يوم الخميس وبعد العمل , مررت عليها وأخذتها, كنت مضطرب قليلاً, وعندما وصلت وجدتها هي أيضاً قلقة. كانت تنتظر عند الباب مرتدية ملابس جميلة ويبدو أنه آخر فستنان قد اشتراه أبي قبل وفاته.ابتسمت أمي كملاك وقالت:' قلت للجميع أنني سأخرج اليوم مع إبني, والجميع فرح, ولا يستطيعون انتظار الأخبار التي سأقصها عليهم بعد عودتي' ذهبنا إلى مطعم غير عادي ولكنه جميل وهادئ تمسكت أمي بذراعي وكأنها السيدة الأولى,بعد أن جلسنا بدأت أقرأ قائمة الطعام حيث أنها لا تستطيع قراءة إلا الأحرف الكبيرة.وبينما كنت أقرأ كانت تنظر إلي بابتسامة عريضة على شفتاها المجعدتان وقاطعتني قائلة:'كنت أنا من أقرأ لك وأنت صغير'.

أجبتها: 'حان الآن موعد تسديد شيء من ديني بهذا الشيء .. ارتاحي أنت يا أماه'.تحدثنا كثيراً أثناء العشاء لم يكن هناك أي شيء غير عادي, ولكن قصص قديمة و قصص جديدة لدرجة أننا نسينا الوقت إلى ما بعد منتصف الليل وعندما رجعنا ووصلنا إلى باب بيتها قالت: 'أوافق أن نخرج سوياً مرة أخرى,ولكن على حسابي'. فقبلت يدها وودعتها

'.بعد أيام قليلة توفيت أمي بنوبة قلبية. حدث ذلك بسرعة كبيرة لم أستطع عمل أي شيء لها.وبعد عدة أيام وصلني عبر البريد ورقة من المطعم الذي تعشينا به أنا وهي مع ملاحظة مكتوبة بخطها:'دفعت الفاتورة مقدماً كنت أعلم أنني لن أكون موجودة, المهم دفعت العشاء لشخصين لك ولزوجتك. لأنك لن تقدر ما معنى تلك الليلة بالنسبة لي......أحبك ياولدي '.

في هذه اللحظة فهمت وقدرت معنى كلمة 'حب' أو 'أحبك' وما معنى أن نجعل الطرف الآخر يشعر بحبنا ومحبتنا هذه. لا شيء أهم من الوالدين وبخاصة الأم ........... إمنحهم الوقت الذي يستحقونه ..

فهو حق الله وحقهم وهذه الأمور لا تؤجل. ---بعد قراءة القصة تذكرت قصة من سأل عبدالله بن عمر وهو يقول: أمي عجوز لا تقوى على الحراك وأصبحت أحملها إلى كل مكان حتى لتقضي حاجتها .. وأحياناً لا تملك نفسها وتقضيها علي وأنا أحملها ............ أتراني قد أديت حقها ؟ ... فأجابه ابن عمر: ولا بطلقة واحدة حين ولادتك ... تفعل هذا وتتمنى لها الموت حتى ترتاح أنت وكنت تفعلها وأنت صغير وكانت تتمنى لك الحياة'

لغاية هنا وانتهت القصة اللي كنت بقرأئها واتمنى أن كل اللي يقرأئها يستفيد منها أي حاجة

تحياتي

بناء الوعي

2008-03-21T07:49:00.000-07:00

بعد تفكير كتتتير عن انسب الحلول لتحسين حياتنا لقيت ان الموضوع محتاج مجموعة حلول للوصل للتغير ده ، وكان من أنسب العناوين اللي ظهرت هو عنوان بناء الوعي لأفراد المجتمع ، طبعا بناء الوعي ده قصة كبيره وليه طرق وأشكال كتتتير وكمان بيحتاج مده زمنيه طويله وجهد كبير عشان نحس بتأثيره بس دايما لازم يكون في بدايه

ومن طرق بناء الوعي أن أفراد المجتمع يعرفوا تراثهم الحقيقي .... يعرفوا أفراده ومثقفيه وعلمائه والناس اللي فعلا بيخافوا على البلد بيعملوا ايه عشان يحققوا التغير ده ....

وهنا انا هكتب كلمات لبعض أغاني ناس ممكن يكون معروفوين لناس كتتتير منا ومش معروفين لناس تانيه بس تعالوا نشوف مختارات بسيطه من بعض الفنانين محبي مصر اللي ليهم مبدأ وسكه واضحه منذ البديات

هكتب كلمات لأغاني للشيخ إمام والأستاذ أحمد منيب والملك محمد منير

كلمات أغنية ... أتجمعوا العشاق ... للشيخ إمام

أتجمعوا العشاق في سجن القلعه .... أتجمعوا العشاق في باب الخلق والشمس غنوه من الزنازن طالعه ومصر غنوه مفرعه في الخلق

أتجمعوا العشاق في الزنزانه مهما يطول السجن مهما القهر

مهما يزيد الفوجر بالسجانه من اللي يقدر ساعه يحبس مصر

أتجمعوا والعشق نار في الدم ... نار تحرق الجوع والدموع والهم

نار تشتعل لما القدم ينضم ... لما الايادي تدور تلم اللحم

واللحم متنتور في رملة سينا والكذب بيحجز على أيدينا

قدم العدو غرسه في لحم ترابي والكذب عشش مخبرين على بابي

والمخبرين خرجين كلاب صعرانه بيجمعوا العشاق في الزنزانه

مهما يطول السجن مهما القهر ... مهما يطول الفجر بالسجانه من اللي يقدر يحبس مصر

مصر النهار يطلقنا في الميادين مصر البكاء مصر الغنا والطين

مصر الشموس الهاله من الزنازين ..... هاله وطارحه في دمنا بساتين

مصر الجناين طارحه مين يقطوفها ... مصر الجنايني للي يرفع سفها

مهما يطول السجن مهما القهر

مهما يزيد الفجر بالسجانه من اللي يقدر ساعه يحبس مصر

كلمات أغنيه ... بلاد الدهب .... للأستاذ أحمد منيب

مشتاقين يا ناس للبيت ...... لنبع الحبايب

لبلاد النخيل والغيط ... على العود اللي غايب

للحب الكبير ... والشوق الكتتتير

مشتاقين يا ناس .... لبلاد الدهب

كبر الشوق جوه القلب كان لسه في حضن الحب

خدنا ومشينا والايام خدتنا ... رحله .... عوده

نوين اننا راجعين يا بلادي ومشتاقين

مشتاقين يا ناس ... لبلاد الدهب

نادرين لما نرجع تاني لبلاد الجمال رباني

جوه البيت هنزرع نخله ... تطرح خير وتعمل ضله

والعصافير تلقط غله في الحوش الكبير والرمله

دار الساقيه في العصريه تحكي حكاوي

والافراح هتملى الناحيه غناوي

مشتاقين يا ناس لبلاد الدهب

كلمات أغنيه .... حدوته مصريه .... للملك محمد منير

منرضاش ...... يخاصم القمر السما

منرضاش ...... تدوس البشر بعضها

منرضاش ... يموت جوه قلبي نداه

منرضاش ... تهاجر الجذور أرضها

قلبي جوايا يغني الاجراس تدق لصرخة ميلاد

تموت حته مني الاجراس بتعلن نهاية بشر من العباد

دي الحكمه قتلتني ... وحيتني ... وخلتني أغوص في قلب السر ... قلب الكون

قبل ما الطوفان ما يجي وخالتني أخاف عليكي يا مصر

وأحكيلك على المكنون

من اللي عاقل فينا مين مجنون

من اللي مدبوح من الالم

من اللي ظالم فينا مين مظلوم

مين اللي ميعرفش غير كلمة نعم

من اللي محنيلك خضار .... دول فلاحين غلابه

من اللي محنيلك عمار ...... عمالك الطيابه

مين اللي بيبيع الضمير وبيشتري به الضمائر

من هو صاحب المسائله والمشكله والحكاية والقلم

رأيت كل شيء وتعبت على الحقيقية

قبلت في الطريق عيون كتير بريئه

أعرف بشر ... عرفوني .... لأ .... لأ معرفونيش

قبلوني .... وقبلتهم

بمد أيدي لك .... طب ليه متقلبنيش

لا يهمني أسمك ..... لا يهمني عنوانك

لا يهمني لونك .... ولا ميلادك

مكانك

يهمني الانسان ولو ملوش عنوان

يا ناس يا ناس هي دي الحدوته

حدوته مصريه

أخيراً أحب أوضح أن الكلامات ممكن متوصلش نفس الأحساس والأفكار ولو سمعتوها أكيد هيكون أحسن، وعلى العموم كل الأغاني دي موجوده واللي عايزه ممكن يقولي ونبقى نتصرف يخدها أزاي

خواطر

2008-03-02T05:53:00.000-08:00

قبل ما أبد الكلام أحب أقولكم ان دايماً بيكون صعب عليا اني اكتب عنوان الموضوع قبل كتابته على الرغم من أني عارف بشكل عام هكتب عن ايه بس وقت الكتابة بسيب أفكاري تتسلسل وتتدفق بدون حواجز وبكتب عن حاجات كتتتير ممكن مكنش عامل حسابي اني أكتبها

المهم أنا بقالي فترة عايز احط في البوست هنا بعض الخواطر والافكار اللي كنت ومازلت أكتبها في دفتر خارجي بخط يدي هذا الدفتر عزيز عندي حيث أنه إهداء من أحد أصدقائي المقربين وهو الاخ كريم الشهير بكريم كرامه ، المهم أنا عملت أسكان لبعض الموضوعات اللي كتبتها من زماااان واحب أوضح من الأول أن خطي وحش وكمان ممكن تلاقلوا أخطاء املائيه بس مش مهم

----------------------------------------------------------
تحديث
واضح اني فاهم موضوع الضغط على الصورة عشان تكبر او عمل كليك يمين عليها وبعد كده حفظ بأسم غلط ومعضله كبيره عند نااااااس كتتتير مع اني كنت فاكر ان الامر بسيط على العموم يا أخونا اضغطوا على الصورة وهي هتكبر ان شاء الله بس اضغطوا كويس
سلام

الفطرة

2008-01-26T01:01:00.000-08:00

من فترة وفي موضوع شاغل فكري وهو تغير صفات الناس اللي حولينا وفضلت أفكر في الفرق بين الفطرة اللي موجودة داخل كل انسان وبين العادات والتقاليد المكتسبه من التعليم أو المجتمع أو البيئة المحيطة بينا وبتأثر في سلوكيتنا وإتجاهتنا فلقيت نفسي حيران بين تحديد السلوكيات والتصرفات الفطرية والسلوكيات والتصرفات الأخرى المكتسبة من أماكن مختلفة

خلينا نوضح الأول أن ذي ما اتعلمنا في المدارس والجامعات أن تعريف الفطرة هو السلوكيات والتصرفات التي يولد بها الأنسان ذي مثلا الرضاعه بالنسبة للأطفال محدش بيعلمهم ده ولكن بالفطره بيعرفوا كذلك بكائهم عند الشعور بالألم برده بيكون بالفطرة من غير تعلم أو سلوكيات مكتسبه من المجتمع المحيط

أما العادات والتقاليد هي برده تصرفات وسلوكيات بس بتكون مكتسبه من المجتمع من خلال التعلم أو ما شابه ذي مثلا قيادة السيارة فمحدش بيتولد بيعرف يسوق ولكن بالتعلم بيكتسب المهارة دي

أنا مشكلتي أن في حاجات كنت فاكرها فطريه فينا وبنتولد بيها بس تقريبا طلعة غلطان

فمثلا لما نشوف راجل كبير في السن واقف قدمنا في مواصلات كنت فاكر أنه من الفطره أن واحد شاب يقوم ويجلسه مكانه بالفطره عادي يعني مش محتاجه تعليم

كمان لما أشوف بنات ماشين بملابس مبيناهم وتخلي اللي رايح واللي جي يتفرج عليهم المفروض انهم يتكسفوا على دمهم ويخجلوا من كده عشان الحياء فطره بس برده طلعة غلطان

في حاجات تانيه كتتتتير بتقابل الواحد بس مش عايز اكملها عشان دمي ميتحرقش أكتر من كده

تقريبا الناس أثبتوا أن الحياء والخجل والغيره والنخوه والرجوله مش صفات فطريه تولد فينا لكنها مكتسبه من البيت والغيط والمدرسه والجامع والكنيسه

والسلام ختام ويارب مصر تكسب السودان اتنين صفر على الاقل

ذكرايات عادية جداً

2007-12-07T06:49:00.000-08:00

مش عارف بس دايما بكون حيران لما ابدأ في كتابة بوست جديد، يا ترى اكتب عن مشاكلي ؟ أكتب عن تجربي ؟ أكتب عن إخفاقاتي او نجاحاتي ؟ طيب اكتب عن ذكرياتي ؟ طيب أكتب عن حاجة بحبها ومش مهم الناس يتقبلوها ولا لأ ؟ ولا اراعي الناس واحاول اكتب حاجة تشد الجميع؟ الأسئلة دي لقتلها اجابة سهلة ومباشرة وواضحة هو ان الانسان مزيج مختلط من حاجات كتتير والحاجات دي هي اللي بتشكل وعيه وتعامله مع الناس وتصرفاته المختلفة. بمعني اكثر وضوحاً انا ممكن اكتب عن كل الحاجات دي ومش لازم اخلي نفسي في مجال واحد بس عشان في الاخر من المطلوب ان الواحد يعبر عن نفسه في جميع الحالات

أنا قررت أكتب عن ذكريات ومواقف حصلتلي في حياتي من زمااااان ومش بنساها ابداً على الرغم من أنها ممكن لا تعني للكثيرين شيء أو تكون مواقف عادية بس أنا دايما متذكرها وأحب أوضح ان اللي هكتبه هيكون غير متسلسل تاريخياً يعني حاجات من زمااان على دلوقتي على زمااان تاني كده يعني ومش هدفي ان حد يعرف حاجة او يستفيد او يتعلم بس الموضوع كله اني هدون حاجة في ذاكرتي انا وخلاص ..... يلا نبدأ

مواقف كتير متخزنه في اللاوعي وبتظهر كل فترة بسبب أو من غير سبب أنا كنت تقريبا في تانيه ابتدأئي وامي كانت مدرسه معايا في نفس المدرسه وطبعا كنت انا ابن الابله ومحدش يقدر يكلمني وفي يوم جم البنات بتوع كليةالتربية عشان يتمرنوا ومش عارف حصل ايه امت البنت اللي بتدرب ضربتني وفضلت اعيط والعيال كلهم بيطيبوا خطري وهي مش عاجبها طبعاً (متعرفش أنا مين) وطبعا أمي عرفت وبهدلة البنت دي ومرعفش مصرها بعد كده ايه

كنت مره أيام الطفوله المشرده بلعب انا واصحابي قال ايه بنعمل نينجا وبنط بين العامير ومن على السور وهوووب مسكني بواب عماره مجاوره لينا على اني حرامي والعيال الأندال طبعا هربوا كلهم وانا فضلت اقوله يا عم انا ساكن جنبك وابويا ظابط وهو مصمم يسلمني للبوليس بس الحمد لله في الاخر سبني بالعافيه

وطبعا اللي متابع معايا يعرف ان من اللي حاجات اللي مش بنساها موضوع المظلات والقفز ده بس ايام التدريب حصل ان كنا في شهر يناير وكان عندي حوالي 15 سنه وخلصنا تمرين اللياقة البدنيه وأخويا الكبير كان معايا وواحد صاحبنا تاني قولنا نزل حمام السباحة .... المهم دخلت أغير والبس المايوه وجيت على حمام السباحة لقيت العيال مش في البسين وبيقولولي انزل دي الميه جميله وطبعا انا هوووب قفزة استارت مرة واحدة وكانت الميه متلجه لدرجة ان قلبي كان هيوقف الميه كانت زي ما يكون فيها مكعبات تلج ومش كده بس ده كمان الامن في النادي عمل شكوى فينا عشان نزلنا البسين وهو مغلق كمان المسئول عن البسين كان نايم واتجازى وانا تاني يوم سمعت كلمتين في التمرين قدام زمايلي ملهمش لزمه وطبعا اخويا وصاحبنا التاني مجوش تاني يوم وانا شربت التهزيق لوحدي

طبعاً في كمان مجموعات ذكريات محفورة في دماغي عن بنات بتتكعبل وهي ماشية وشكلها بيكون وحش قوي ومحرجة ومش عارف على الرغم من أني مليش علاقة تماما بالموضوع اللا انا كمان بتحرج جداً

حاجة غريبة قوي وانا بكتب دلوقتي وعامل افتكر ...... هههههه مش فاكر حاجة
انا طول عمري مش بشتم وبحاول افضل كده على طول وفي مرة وانا ماشي مع اعز اصدقائي في ثانوي شتمته بأخته عشان انا عارف ان الام مقامها اعلى بكتتير فللأسف لقيته زعل جداً ولما فهمته ليه قولة كده قالي ان الشتيمه بالام بتحصل من ناس كتتير بس الاخت لأ
أول مرتب حصلت عليه وانا في سنه ثالثة كلية كان 40 جنيه ودول عبارة عن مرتب اسبوع في محل بازار في الموسكي وكنت فرحان جداً به عشان دي فلوس اللي تعبت بيها طول الاسبوع
أيام الطفوله المشرده برده كنت في ساعة عصاري وتعلقت على الشجرة قال ايه بغني وبلعب وهووب وقعت من على الفرع العالي على ايدي وانكسرت وده كان في اول اجازة الصيف وطبعا فضلت متجبس طول الصيف والعيال بيلعبوا بس برده كنت بلعب معاهم واللي ميعجبنيش اضربه بالجبس على دماغه
كنت بعلب كورة في المطار وفي هاجمه مرتده للفريق بتاعي وبسرعة صاحبي وائل لعب الكورة برازيليه عرضية على الارض وانا بكل معلمه عدتها بين رجلي ولعبتها بكعبي في الجون وكانت لعبه جامده قوي
كمان مرة كنت في الثانوي وكنا كل يوم بنلاعب فريق المدرسة الصبح قبل بدأ الدراسة (كل الطلاب كانوا بيتفرجوا علينا ومحدش يجروء يخش الملعب واحنا موجودين بيتفرجوا بمزاجهم أو بالعافية) المهم انا مدي ظهري للجون بتاع الفريق المنافس وواقف وراي مدافع منهم وانا هوووب لفيت وشط الكورة من جنب المدافع في الجون وسمعت واحد من الطلاب بيقول (وبجد) أهو ده مستقبل مصر وفعلا كنت هلعب في فريق طلائع الجيش بس قال ايه قولت المذكرة أهم يلا نصيب عشان ابو تريكة ياكل عيش
طبعا في حاجات تانيه كتتتير بس كفاية تسيح لحد كده

سلام

2007-11-01T06:34:00.000-07:00

بقالي مدة مش عارف اكتب حاجة يمكن عشان مضايق او زهقان او مخنوق اوي اي حاجة عادي يعني واكيد كل واحد منا بيمر بوقت زي ده بيكون مش عايز يعمل فيه اي حاجة، مش عشان كسلان ولكن عشان الاسباب سالفت الذكر

المهم أنا شخصياً لما بكون في الحالة دي بحب أعمل حاجات معينه ساعات كتتتير بتساعد الواحد انه يغير من موده ويكون أحسن ...... من الحاجات دي مثلاً إني بحب أقف على الكورنيش واخلي الهوى يطس في ..... واخلي نظري يوصل لأبعد نقطه ممكنه، وساعات تانيه بحب أجري حول سور الكلية الحربية في مصر الجديدة رغم ان الفعلين دول مختلفين من حيث السكون والتأمل والحركة والنشاط إلا انهم بيوصلوني لنفس النتيجة وبكون أحسن الحمد لله. ويا رب كل واحد منا يكون عنده حاجة تخليه أو تساعده أنه يغير موده

بس من أهم الحاجات اللي بتخرجني من المود ده هو تذكري ليوم محدد في حياتي، وطبعاً خيالكم ميروحش بعيد وكل واحد يشطح بتفكيره .... هحكلكم عن اليوم ده ....

كان عندي 15 سنه وكنت مشترك في النادي في لعبة اسمها القفز الرياضي بالمظلات وألعاب الهواء، وكنت بروح النادي الصبح واحصل على التدريب وأستفد منه في نواحي كتتتير ممكن ابقى أقولها بعدين .... المهم جه يوم بعد إنتهاء فترة التدريب والكابتن قال لينا إن بعد كام يوم هنقوم بأول قفزة حقيقية من الطائرة ....... طبعا الناس كلها انبسطة وانا مختش في بالي عادي يعني أيه المشكله محنا طلع عنينا في التدريب

وجه اليوم الموعد كان التجمع في النادي الساعة 6 صباحاً لجميع الأفراد اللي هيقوموا بالقفزة دي من مختلف النوادي على مستوى الجمهورية بعد كده روحنا في عربيات رحلات على مطار شرق وكله وقف طابور عشان يستمل من عربيات الزل المعدات بتاعته (مظلة أساسي - مظلة إحتياطي - واقي رأس) وكله ده عادي وفهمينه وتم التدريب عليه

شويه كده وجه قائد المطار ومر على صف اللاعبين اللي هيقفزوا وطلع كام واحد من الصف وانا كنت منهم ..... سأله المدرب أيه الحكايه قاله دول مش هيقفزوا عشان وزنهم خفيف وممكن المظلة متفتحش أو يحصل مشاكل في القفز .... طبعاً أنا قلبي وقع في رجليه

المهم جابوا ميزان ووزانونا والحمد لله قالوا ده يعدي ورجعت للصف تاني وبدأنا نتحرك على الطائرة C-130 ، الطائرة من الدخل مقسمه جدار يمين ويسار ووسط يمين ويسار وكان موقعي داخل الطائرة أول واحد في الجدار اليمين وتصورت أني أول واحد هقفز من الطائرة .... وخفق قلبي مجدداً

بدأت الطائرة في الحركة ثم صعدت بشكل حاد إلى الهواء (دي كانت أول مرة أركب طائرة في حياتي) وبدأنا في قرأت الفاتحة واقتربنا من منطقة القفز وتم فتح باب الطائرة فإذ بهواء شديد يرتطم بأجسامنا ووجهونا ثم بدأ الوسط الأيمن القفز من الطائرة وهنا فهمت أني سوف يأتي دوري بعد الإنتهاء من قفز لاعبي الوسط الأيمن

كان منظر في غاية الغرابة ولن أنساه طيلة عمري، أتعرفون عندما تلقون بمنديل من شباك سيارة مسرعة؟ تجد المنديل (اتشفط للخارج) كانت الطائرة هي السيارة واللاعبين هم ولا مؤخذه المناديل، أنا فاتح فمي ومبحلق عنيا ومش مصدق أن أصحابي وزمايلي بيطروا بره بالشكل ده ..... ثم جاء علي الدور.....

كان عقلي متوقف تماما عن التفكير وتقريبا قلبي متوقف عن النبض ورأتاي متوقفتان عن التنفس (واحد عنده 15 سنه واول مره يركب طيارة وهينط منها وهو مش فاهم ايه اللي بيحصل) وهوووووب ...... هدوء ..... صفاء ...... راحه .... هواء رقيق.

بصيت لقية ايه ؟؟؟ خير اللهم اجعله خير قال ايه الطيارة ماشيه بعيد عني وباقي زمايلي بيقفزوا منها .... طبعا في حاجات مهمه جداً لازم تتعمل أول ما يتم القفز أهمها أنك تبص على المظلة تشوفها مفتوحه ولا مقفوله ... مقطوعه ولا سليمه .... فيها مشكله ولا لأ ؟

أنا بصيت فوق ملقتش المظلة ...... بس لقيت نفسي نازل براحه فبصيط لأعلى لقيتها (في المرة الأولى تم النظر للأمام ولأعلى وفي المرة الثانيه لأعلى وبشكل عمودي)

طبعاً انا مش حاسس أني بنزل إلى الأرض بل شعرت أني أرتفع إلى السماء وهنا تذكرة كلام قائد المطار وتعليقه على مسألة الوزن ولكن أيضاً تذكرة كلام المدرب حيث قال لنا أن أول قفزة سوف تشعر أنك لا تهبط إلى الارض ولكن الحقيقة أنك تهبط

والحمد لله وصلت للأرض في سلام وشعرت أني بطل وعملت حاجة مش اي حد ممكن يعملها وكنت حاسس اني لو جاني عشر رجاله هضربه وكنت حاسس اني قوي جداً وكنت مبسوط وسعيد لدرجة خلتني كل ما أكتئب أفتكر أول قفز ليه

طبعاً بعد كده أصدقائي قالولي ان في أنوار كانت على الباب صفرا وخضرا وده ليه علاقة بمكان القفز كمان قالولي ان فيه جرس ضرب بصوت عالي عشان نبدأ القفز بس الكلام ده كله شوفته وسمعته في القفزات التانية بس أول مرة يدوبك اللي حصل هو اللي انا فاكره وحكيت عليه

على فكرة في قفزة من القفزات التاليه حصلي فقدان مؤقت للذاكرة بس مش وقته بقى.

ويا رب كل واحد منا يكون عنده حاجة تخليه أو تساعده أنه يغير مودهويا رب كل واحد منا يكون عنده حاجة تخليه أو تساعده أنه يغير موده

دعوة للضحك ... نكت يعني

2007-10-09T04:42:00.000-07:00

استكمالا لمشوار بناء الوعي والمشاركة الإيجابية في تغير حالة الناس إلى الأفضل انا قررت اكتب حبت نكت جميلة عشان نضحك شوية ونعرف نتعامل مع وقعنا المرير... يا رب تعجبكم

واحد راح يشتري عربية .لقى كل العربيات غالية عليه.بعدين لقى عربية قديمة و عليها تراب كتير بس سعرها مناسب.صاحب المحل قال له العربية دي فيها ميزة هايلة.بص كدة ..وقام مسح بإيده التراب اللي عليها قام طلع منها عفريت .قال له :شبيك لبيك تطلب إيه؟ قال له هات شاي للبيه حالاً..في لحظة كانت كباية الشاي قدام الراجل .قام اشترى العربية فوراً و ساقها و طلع بيها على حتة أرض فاضية و قام نزل و مسح التراب اللي علي العربية. قام طلع له العفريت. قاله عايزك تبني لي هنا قصر كبير فيه جنينة و حمام سباحة و ملعب تنس و..... قام العفريت قال حيلك حيلك إنت فهمت غلط .. أنا شاي و قهوة بس

مرة واحد مسطول قاعد يفكر مع نفسه ويقول "جمبرى فى الطبق؟ لا لا ارنب فى الجردل؟ برضه لا مش دى استكوزا فى البانيو؟ يوووة برضه مش دى، انا هتصل اعرف من الدكتور احسن." راح اتصل بيه وساله "يا دكتور انا عندى ايه؟" قال له "انا قولت لك ميت مرة انت عندك سرطان فى الحوض

واحد غبي جاله عقد عمل فى الكويت، يوم السفر قاعد فى المطار فالمذيع الداخلى بيقول : "على ركاب الرحله 770 المتوجهه الى الكويت التواجد بصاله الدخول"، "النداء الاخير لركاب الرحله 770 المتوجهه الى الكويت التواجد بصاله الدخول." فموظف المطار بيقوله "رحله الكويت هتطلع يا أستاذ" ، فيرد عليه ويقوله : "يا عم دول طالعين رحله .. انا

طالع شغل

واحد رخم دخل أحد المطاعم وطلب صحن فول، وبعدما أنتهي من آكله سأل الجرسون: كم تريد ثمناً للفول، اجابه: 13 قرشاً..مد الخبيث يده في جيبه وأخرج ال13 قرش ورماها على الارض.. وتكرر المشهد 3 أيام متتالية. وفي اليوم الرابع دخل المطعم وما معاه فكه فاعطى الجرسون 25 قرش وقال له واحد فول، طبعا الجرسون حب ينتقم منه فاحضر الباقي(12)قرش ورماهم على الارض وقال له خذ الباقي، فاخرج الرخم قرش من جيبه ورماه فوق ال( 12) قرش وقال

للجرسون كمان واحد فول

أغبيه راحو يلعبو بلياردو، واحد منهم وقف فوق الطرابيزة وقال لهم انا الجوووون

واحد متجوز وقاعد في البيت وبيبص كتير في عقد الزواج، مراته قالت له: "بتبص في عقد الزواج ليه يا حبيبي؟ " قالها: "بأبحث عن تاريخ إنتهاء العقد .

واحد قاعد في أمان الله بيقرا الجرنان، وفجأة جت مراته وضربته بغطا الحلة فوق دماغه .. طرررررخ !!! الزوج: "فيه ايه يا بنت الحلال؟ ليه كدا ؟؟؟ " الزوجة : "ايه الورقه اللي في جيب بدلتك ومكتوب عليها "سوسو"؟؟ " الزوج: "يا بنت الحلال، ده اسم الحصان اللى بنشجعه في السباق !" الزوجه صدقته وراحت لحالها... بعد اسبوع، الزوج قاعد في أمان الله يقرا الجرنان، وفجأة جت مراته وضربته بغطا الحلة على راسه !! الزوج: "خير يابنت الحلال في ايه تاني؟؟ "

الزوجه:"حصانك على التليفون

واحد بيقول لمراته ... أنا النهاردة عايز رومانسية فى البيت ... راحت الزوجة سألت أمها : يعنى إيه رومانسية ؟؟ الأم : مش عارفة بس احتياطى إنقعى الرز

واحده وحشة بتقول لجوزها بكره عيد ميلادى . قالها نقف دقيقتين حداد

بلديتنا مجنن مدرس الجغرافيا عاوز يعرف خط الاستواء كليك ولا موبينيل

قمة الهدوء.......... انك تسمع شريط فاضى > وقمة الرخامة ......................... انك تقلب الشريط >

وقمة التناحة....... انك تعيد حتة عجبتك

بلديتنا جاؤوا يوسوسوله 6 شياطين ليش؟؟ عشان واحد يوسوس والباقي يفهموه.

مرة واحد الدغ بيبعد رسالة لحبيبته بيقلوها يا يوح يوحى ، يوحى ويوحك يوحين ، ان راحت يوحك تروح يوحى معاك

أتنين مساطيل حبو يزيفو فلوس , راحوا عاملين فلوس كتير الورقه بـتمنتاشر جنيه , و راحو لواحد صاحبهم و قالو له معاك فكة تمنتاشر جنيه , قال لهم تاخدوهم تسعتين

مختارات من رباعيات صلاح جاهين

2007-09-23T02:29:00.000-07:00

نظرت في الملكوت كتير وانشغلت

وبكل كلمة ليه ؟ وعشان ايه ؟ سألت

أسأل سؤال .. الرد يرجع سؤال

وأخرج وحيرتي أشد مما دخلت

عجبي !!

خرج أبن أدم من العدم قلت: ياه

رجع أبن أدم للعدم قلت: ياه

تراب بيحيا .. وحي بيصير تراب

الأصل هو الموت والا الحياة ؟

عجبي!!

ضريح رخام فيه السعيد اندفن

وحفره فيها شريد من غير كفن

مريت عليهم .. قلت يا للعجب

لاتنين ريحتهم فيها نفس العفن

عجبي!!

والكون ده كيف موجود من غير حدود

وفيع عقارب ليه وتعابين ودود

عالم مجرب فات وقال سلامات

ده ياما فيه سؤلات من غير ردود

عجبي!!

كان فيه زمان سحلية طول فرسخين

كهفين عيونها وخشمتها بربخين

ماتت. لكن الرعب لم عمره مات

مع إنه فات بدل التاريخ تاريخين

عجبي!!

أحب أعيش ولو أعيش في الغابات

أصحى كما لودتني أمي وابات

طائر .. حوان .. حشرة .. بس أعيش

محلا الحياة .. حتى في هيئة نبات

عجبي!!

عجبتني كلمة من كلام الورق

النور شرق من بين حرفها وبرق

حبيت أشيلها في قلبي .. قالت حرام

ده انا كل قلب دخلت فيه اتحرق

عجبي!!

قالوا الشقيق بيمص دم الشقيق

والناس ما هياش ناس بحق وحقيق

قلبي رميته وجبت غيره حجر

داب الحجر .. ورجعت قلبي رقيق

عجبي!!

يوم قلت آه .. سمعوني قالوا فسد

ده كان جدع قلبه حديد واتحسد

رديت على اللايمين أنا وقلت .. آه

لو تعرفوا معنى زئير الأسد

عجبي!!

دخل الربيع يضحك لقاني حزين

نده الربيع على إسمي لم قلت مين

حط الربيع أزهاره جنبي وراح

وأيش تعمل الأزهار للميتين

عجبي!!

مهبوش بخربوش الألم والضياع

قلبي ومنزوع م الضلوع أنتزاع

يا مرايتي يا اللي بترسمي ضحكتي

يا هلتري ده وش والا قناع

عجبي!!

حبيت .. لكن حب من غير حنان

وصاحبت لكن صحبه مالهاش أمان

رحت لحكيم واكتر لقيت بلوتي

إن اللي جوه القلب مش ع اللسان

عجبي!!

ليه يا حببتي ما بينا دايماً سفر

ده البعد ذنب كبير لا يغتفر

ليه يا حبيبتي ما بينا دايماً بحور

أعدي بحر الاقي غيره اتحفر

عجبي!!

ورا كل شباك ألف عين مفتوحين

وانا وانتي ماشيين يا غرامي الحزين

لو التصقنا نموت بضربة حجر

ولو افترقنا نموت متحسرين

عجبي!!

نوح راح لحاله والطوفان استمر

مركبنا تايهة لسه مش لاقية بر

آه من الطوفان وآهين يا بر الأمان

إزاي تبان والدنيا غرقانه شر

عجبي!!

على رجلي دم .. نظرت له ما احتملت

على أيدي دم .. سألت: ليه؟ لم وصلت

على كتفي دم .. وحتى على رأسي دم

أنا كلي دم .. قتلت؟ والا اتقتلت؟

عجبي!!

أنا كل يوم أسمع .. فلان عذبوه

أسرح في بغداد والجزائر واتوه

ما اعجبش م اللي يطيق بجسمه العذاب

واعجب من اللي يطيق يعذب أخوه

عجبي!!

عجبى

2007-09-18T01:26:00.000-07:00

في البداية أحب اهنئكم جميعا بشهر رمضان الكريم واتمنى أن يحقق كل فرد ما يتمناه خلال ذلك الشهرالكريم

، بصوا بقى يا جماعة أنا الفترة اللي فاتت كنت بشوف مدونات كتتير وموضوعات كتتتير وكانت موضوعات مختلفة في الاتجاهات ووجهات النظر وطبعا زي ما انتم عرفين فيه مدونات سياسية ومدونات بتعرض مشاكل مجتمعاتنا ومدونات تانيه الواحد بيعرض فيها وجهة نظره في اي موضوع ومدونات شواذ وما إلى ذلك يعني مدونات على كل شكل وكل نوع وانا مش عايز أطول عليكم.... بس احب أوضح أن كل الكلام ده يعتبر أكيد خطوة للأمام حتى لو متأخره عشرين سنه حتى لو مش مسموعه حتى لو مش مأثره بس في الأخر تعتبر خطوة لتغير ثقافتنا ومجتمعاتنا خطوة عشان نكون أحسن

وفيه أغنية لمحمد منير سمعتها من زماااااان بس مش عايز أنساها بتقول * أتكلموا ...في البدء كانت كلمة الرب الآله.. خلقت حياة.. ومنها الخلق اتعلموا... فأتكلموا أتكلموا.. الكلمه أيد.. الكلمه رجل.. الكلمه باب ...الكلمه كوبري صلب فوق بحر العباب... الجن يا أحباب ما يقدر يهدمه فأتكلموا * وطبعا البحر العباب هو البحر المتلاطم الأمواج وده لأخونا متصفحي المدونات أقل من عشرة سنوات لكن أكيد الباقي عرفين

على فكرة كل اللي فات ده كان مقدمه لموضوع المدونه الجديد بتاعي.. أنا إن شاء الله نفسي أساهم في نشر الوعي بين أفراد مجتمعنا بكل طبقاته واختلافاته ... والوعي دي في كل حاجة يعني في السياسة والاقتصاد والمعاملات الانسانية والدين وكل حاجة وانا اخترت أبدأ بنشر الوعي عن الكلام أو الشعر ... فاخترت فيلسوف ولاد البلد عمنا وعم الشباب الشاعر صلاح جاهين .... عشان نعرف عنه وعن أشعاره وانا اخترت جزء من الرباعيات بتاعته عشان انشرها عنه وطبعا اللي عايز الكتاب نفسه ممكن أسلفهوله بس طبعا هيدفع تأمين وكمان أنا منزل رباعياته اللي غنها ولحنها سيد مكاوي برده اللي عايزها على فلاشه أو سي دي ممكن ونبقى نتكلم في السعر بعدين. أنا عارف ان كده أنا رغيت كتتير بس هأختم بأول رباعية في المدونه أخترتها لكم بتقول

أنا شاب لكن عمري ولا ألف عام

وحيد ولكن بين ضلوعي زحام

خايف ولكن خوفي مني أنا

أخرس ولكن قلبي مليان كلام

!!عجبي

الذئب والأرنب

2007-09-02T23:51:00.000-07:00

كل ذئب طيب فى تصرفاته، فليس هناك حيوان مفترس يحمل بداخله الشر والمكر وبالطبع هذا يظهر للحظة الأولى كلام متناقض فكيف يكون مفترس وليس شرير أو ماكرفى نفس الوقت، وهذا بسيط للغاية فهذا الحيوان المفترس لا يأكل إلا عندما يجوع ولا يقتل حباً فى القتل، ولو هذا صحيح فهى غريزة بداخله أعطاها إياها الوهاب، فعندما نرى نحن بنى البشر أى حيوان يفترس حيوان آخر أو يستخدم المكر والخديعة لذلك نحكم عليه بالشر وأنه حيوان آثم، رغم أنه لم يعدو سوى حيوان يدافع عن حقه فى البقاء فى قانون الغابة الذى يحكم عليه ذلك وهنا تظهر الغريزة داخل الحيوان فى حب البقاء، كذلك لو نظرنا إلى أى حيوان نباتى مثل الأرنب فهو يأكل الجزر ويلتهمها ويقضى عليها، فهل لأنها لا تنزف دماً أو تحاول الفرار منه حفاظاً على حياتها نقول عليه حيوان طيب ومسالم، رغم أن نفس الغريزة هى التى تدفعه لأكل هذه الجزرة حتى يضمن حياته، إن الدافع واحد ولكن الطريقة مختلفة ومتاحة فى كلاً من الحالتين فى عالم الحيوانات والسبب فى إعتقادنا هذا هو نظرة البشر إلى تلك الحيوانات وهى نظرة تنطوى على كثير من الذاتية وبعيدة عن الموضوعية والتى هى مطلب كل ناظر وباحث عن الحقيقة