من فترة وفي موضوع شاغل فكري وهو تغير صفات الناس اللي حولينا وفضلت أفكر في الفرق بين الفطرة اللي موجودة داخل كل انسان وبين العادات والتقاليد المكتسبه من التعليم أو المجتمع أو البيئة المحيطة بينا وبتأثر في سلوكيتنا وإتجاهتنا فلقيت نفسي حيران بين تحديد السلوكيات والتصرفات الفطرية والسلوكيات والتصرفات الأخرى المكتسبة من أماكن مختلفة
خلينا نوضح الأول أن ذي ما اتعلمنا في المدارس والجامعات أن تعريف الفطرة هو السلوكيات والتصرفات التي يولد بها الأنسان ذي مثلا الرضاعه بالنسبة للأطفال محدش بيعلمهم ده ولكن بالفطره بيعرفوا كذلك بكائهم عند الشعور بالألم برده بيكون بالفطرة من غير تعلم أو سلوكيات مكتسبه من المجتمع المحيط
أما العادات والتقاليد هي برده تصرفات وسلوكيات بس بتكون مكتسبه من المجتمع من خلال التعلم أو ما شابه ذي مثلا قيادة السيارة فمحدش بيتولد بيعرف يسوق ولكن بالتعلم بيكتسب المهارة دي
أنا مشكلتي أن في حاجات كنت فاكرها فطريه فينا وبنتولد بيها بس تقريبا طلعة غلطان
فمثلا لما نشوف راجل كبير في السن واقف قدمنا في مواصلات كنت فاكر أنه من الفطره أن واحد شاب يقوم ويجلسه مكانه بالفطره عادي يعني مش محتاجه تعليم
كمان لما أشوف بنات ماشين بملابس مبيناهم وتخلي اللي رايح واللي جي يتفرج عليهم المفروض انهم يتكسفوا على دمهم ويخجلوا من كده عشان الحياء فطره بس برده طلعة غلطان
في حاجات تانيه كتتتتير بتقابل الواحد بس مش عايز اكملها عشان دمي ميتحرقش أكتر من كده
تقريبا الناس أثبتوا أن الحياء والخجل والغيره والنخوه والرجوله مش صفات فطريه تولد فينا لكنها مكتسبه من البيت والغيط والمدرسه والجامع والكنيسه
والسلام ختام ويارب مصر تكسب السودان اتنين صفر على الاقل
34 comments:
هقولك لحضرتك حاجة يا استاذ يحي هي الأشياء الي حضرتك ذكرتها دي حاجات فطرية يعني كلنا بيبقى عندنا حياء ونخوة ورحمة بس الي بيحصل ان المجتمع هو الي بيغير الصفات دي ويجعلها مكتسبة وبيدها اسم تاني وهي الجليطة وقلة الذوق والقسوة بس هرجع واتذكر قول الرسول " الخير في أمتي "
اذا كان تعاليم الدين الاسلامي كلها فطرة واحنا اصلا دين الفترة المشكلة ان الناس مع تغير المجتمع بتتغير علشان تواكب الاحداث ولو تطلبت مواكبة الاحداث تغير في الفطرة مش مشكلة في سبيل التغير الاجتماعي
واكيد الحاجات دي موجودة في كل حد فينا في اللي بينميها وفية اللي بيتركها جانبا
يااااااااااااااااااارب نكسب يسمع منك ربنا
سلام
قلوب حائرة
بصي هي وجهة نظر بس معنى كده ان الفطرة بتاعتنا مش سليمة او ملهاش اساس قوي والا ما كنتش اتغيرت بالشكل ده.
تحياتي
my hopes
انا اعتقد ان الفطرة اللي الانسان بيتلود بيها المفروض انها متتغيرش بتغير المجتمع من حولنا
تحياتي
اية دة
بوست جديد
يا الف مليون مبروك
ومبروك كمان علشان مصر غلبت السودان وعقبال الباقي
اما بقى موضوع الفطرة فأنا شايفة انها بدأت تختفي من حياتنا فعلا
انا مش بركب المترو كتير بس الاسبوع اللي فات ركبت المترو مرتين
اول مرة فضلت ماشية لغاية اول عربية علشان هي بتاعة السيدات وكانت فاضية وقعدت وبعدين حسيت ان الناس مش هي الناس يعني في رجالة قاعدين معانا عادي جدا ولسة هاسأل البنوتة اللي قاعدة جانبي لقيتها بتسألني هي مش دي عربية السيدات؟
وكان قاعد قدمنا اتنين رجالة منهم راجل شيخ كبير
فتكرم الشيخ وقالنا : لأ عربية السيدات بقت في النص
ولم يكتفي بهذا الرد وراح باصص للراجل اللي جانبة وقالة : اة اصلهم خايفين عليهم قوي .. عاملين لهم عربيتين بحالهم مش يركبوا فيهم بقى لأ لازم يزحمونا ...وفضل يقول كلام كتير من النوعية اللي تحرق الدم وقام تكرم واحد تاني من ورايا وراح قايل : كل مصيبة تلاقي وراها واحدة ست
بصراحة بصراحة انا مانزلتش وقعدت اضحك اضحك بس بيني وبين نفسي كنت مضايقة ولولا انة راجل كبير... ماكنتش هاعمل حاجة برضة وكنت هاقعد اضحك
بعد كل الرغي دة انا قصدي اقولك انة عيب لما يقولوا الكلام دة في وجود السيدات عاوزين يسبوا ويلعنوا مش لازم قدامنا مع اني متأكدة ان مفيش حد من الرجالة دول وخصوصا الراجل اللي قال كل مصيبة وراها ست
يقدر يقول كلمة واحدة من دي قدام المدام
المرة التانية بقى ركزت وعرفت عربية السيدات فين وركبت فيها وياريتني ماركبت
اول حاجة
شوية بنات قاعدين على الارض وصوتهم عالي جدا جدا
اللي اعرفة واللي امي علمتهولي انة عيب لما البنت تكون صوتها عالي وخصوصا في الشارع وحتى لو كانت العربية كلها سيدات يبقى عيب برضة
تاني حاجة
واحدة ست كبيرة واقفة وبنات قاعدين
قعدت ابصلهم يمكن تعبانين والا حاجة لقيتهم عادي وزي القرود
واللي عاملة نفسها مش واخدة بالها واللي ماسكة ودن زميلتها وعمالة ترغي واللي ماسكة كتاب وبتقرا فية واللي بتلعب في الموبايل
واللي حرق دمي اكتر انهم كانوا قاعدين مزنوقين في بعض ولما واحدة منهم قامت علشان تنزل راحو قاعدين واخدين راحتهم وماهانش عليهم يقعدوا الست الكبيرة
رحت ماسكة الست الكبيرة من اديها وقلتلهم اتخروا شوية علشان الحاجة تقعد
طبعا ماكانش عاجبهم وبصولي بقرف بس انا عملت نفسي مش واخدة بالي
اخر حاجة بقى علشان انا طولت عليك
ابقى فكرني اتخانق مع البنت دوبة علشان ماقالتليش انهم غيروا مكان عربة السيدات
وشكرا
ملحوظة اخيرة
المسكن اللي هاتاخدة علشان الصداع هايبقى على حسابي
دمت بكل ود
انا كنت عاوزة اتكلم على لبس البنات
فقلت اكتب تعليق تاني ممكن
ايوة ممكن
شكرا
شوف يااستاذ
فين الأب والأم اللي بيسيبوا بناتهم ينزلوا كدة؟
انا اعرف ان الراجل اللي مش بيغير على اهل بيتة بيبقى اسمة ديوس واعتقد ان من ضمن الغيرة انة يغير على جسم بنتة
بس في حاجة كمان غريبة شوية
احنا زمان ماكانش في حد بيعلق على لبسنا يعني احنا من جوانا كنا بنبقى مكسوفين ومش بنرضى نلبس حاجة تفسر الجسم لكن دلوقتي اديك شايف الجيل عامل ازاي والبت الجبارة عاوزة تشغلني رقاصة وماعندهاش اي مشاكل
تحياتي ياأخ يحيى ولو افتكرت حاجة كمان عاوزة اتكلم فيها هابقى اكتب تعليق كمان
shahy
الاخت شاهي .... الله يبارك فيكي وعقبال متشوفي الشينوير مدون اد الدنيا، بس فعلا انا مش عارف الحل فين ؟؟ هل كل منشوف حاجة غلط نتكلم وننصح ونتخانق ولا هنجيب لنفسنا الكلام ، هل السلبيه هي الحل في الوقت اللي احنا عايشنه ده ؟؟ ولو هي الحل هنروح فين من حديث رسول الله عليه وعلى آله الصلاة والسلام من رأي منكم منكرأ فليغيره بيده فإن لم يستطيع فبلسانه فإن لم يستطع فبقلبه وذلك أضعف الايمان، هل هو ده وضعنا دلوقتي .. أضعف الايمان ؟؟؟
وطبعا كل تعليقات مرحب بها في اي وقت ، بس لو أكتر من ثلاثه هتدفعي ايجار لمكان التعليق 25 قرش
سلام
على الرغم من تأثير الفطرة اللى بنطلع بيها علينا الا ما نكتسبه من المجتمع اقوى واعمق وخاصة ما نكتسبه خلال فترة الطفلوة لانه يمتد معنا حتى الكبر
من المعقول والمتوقع ان توجه الفطرة العادات المكتسبة للأتجاهات الصحيحة والتى بدورها تجعلنا نعيش بشكل هادىء نسبيا ولكن مع كل متغيرات المجتمع الحالى نجد ان كل منا يتغلب عليه العادات المكتسبة السيئة ولا تقوى الفطرة على إرضاء احتياجات الانسان بالشكل المرضى مثلها مثل العادات السيئة
رأيى الشخصى ن كل منا يجب عليه ان يتتبع عاداته الصحية ومحاولته التعامل بالفطرة النقية ولكل عمل ثوابه وكل منا يحاول بطريقته ومع مجتمعه والمحيطين به وعدم اليأس فى تقديم النصيحة والعتاب للآخرين من آن لآخر لمحاولة إيقاظ النقاط الجيدة بداخلهم وحثهم على استخدام ورجوعهم لفطرتهم النقية
موضوع ممتع للغاية
وأرجو ألا تغيب عن الساحة كثير هكذا
لك امنياتى بكل الخير
تحياتى
هبة
اخى يحيى
الحياء والخجل
احترام الصغير للكبير
العفو عند المقدرة
العون والمساعدة
النخوة والرجولة
الصدق والاخلاص والأمانة
والكثير من الصفات الجميلة
التى يبدو اننا نشتاق اليها
هذه الأيام
رغم انها من تعاليم ديننا الحنيف
تُرى!! ماذا حدث؟
لا ادرى
أشكرك على الدعاء
لك بمثله يارب
ربنا يحفظك ويحفظ اسرتك الصغيرة واسرتك الكبيرة يارب
كاميليا
doba
فعلا الحياة بتاعتنا دي حياة اختبار ، لو ركزنا فيها هتلاقي ان حلوها ومرها برده اختبار بس دايما الانسان بينسى وبيضيع من فكره سبب وجوده الاساسي في الدنيا دي
سلام
كاميليا
للاسف في حاجات كتتتير بضيع منا في زحمت الحياة ، بس لازم نفهم دايما ان كل المتغيرات اللي بتأثر فينا وتخلينا نغير من سلوكيتنا للأسف تدل على أن معدنا غير نفيش بدليل التغير من الاحسن إلى الاسوء ، أنا عارف كويس ان وقت الشدائد تعرف الرجال بس برده الفضيلة والسلوكيات الايجابية مطلوبه في اوقات غير الشدائد
تحياتي
الف مبروك مصر كسبت السودان
بس مش عارف كام
انا مش بتابع الكوره اصلا
المهم
تسلم ايدك صحيح انا تنحت شويه في اول الموضوع مش غباء مني ولا حاجه بس الكلام كان تخين حبتين وبياخد وقت معايا علشان اهضم المهم برده
انا برده كنت زيك بحسب ان الحياء فطره
بس اتأكدت انه مش فطره خالص
ويمكن تكون الفطره هي قلة الحياء
ليه بقى
علشان لقيت السواد الأعظم من الناس- حلوه السواد الأعظم دي - لقيتهم مفيش حياء ولازم تكون الأسره من البدايه خالص زرعت في الشخص فكرة الحياء علشان يتقبلها بعد كده
والغريب تلاقي الناس تقولك لا خلي العيال تطلع ناشفه
فين النشوفيه في ان البنت او الود معندهوش حياء
تلاقي البنت لابسه حاجه المفروض يعني تتحرق بيها فورا
والواد ماشي مثلا لابس فانله بترتر ومعلق صورة واحد زباله اصلا وعامله مثله وقدوته
يمكن هي دي النقطه
فين القدوه
لما الأهل اصلا معندهومش حياء
تلاقي الست من دول تقولك لا انا بنتي في فرحها كانت لابسه فستان يهبل حمالالت وحبشتكانات واللي باين اكتر من المتغطي وبتقولها ومبسوطه قوي
وكأنها بتفتخر ان بنتها رخصت نفسها
ما علينا من دول
تلاقي الراجل ابنه صايع وحرامي ويقولك اصله كسيب وجدع وراجل
يمكن المفروض نبتدي من الأباء والأهل
ولا نبتدي من الصغيرين على امل مستقبل افضل
بس برده الكبار هيخربوا الصغيرين
مش عارف
مبقتش فاهم
اقولك سلااااااااااااااااااااام
أهي مصر شحورتهم
امممممممم بص يا يحيى احنا اللى المفروض نكتسب الصح ونبعد عن الغلط ولو حتى اكتسبنا الغلط بحكم العادات والتقاليد اللى بنقول عليها لو فكرنا بعقلنا اللى ربنا وهبه لينا يبقى المفروض نغير الغلط بس تقول ايه ولمين احنا شاطرين ننقد فى بعض وبس وعموما مصر غلبت السودان هههههههههههههه ده علشان انا جيت متأخر
الشنكوتي الكبير
عمي وعم الشباب ، الموضوع ان معظم الناس عارفين الصح من الغلط بس دايما مفيش ارادة لعمل الصح وخصوصا لما يكون صعب واكيد الغلط اسهل وخصوصا لو مش عارفين العواقب ودي طبيعة السواد الاعظم من الناس (حلوه قوي منك السواد الاعظم دي) . لو بتسألني عن الحل أقولك لازم نعمل كلنا زيادة وعي لأنفسنا واللي حوالينا ساعتها هنكون احسن ، بس للأسف موضوع زيادة الوعي ده محتاج وقت وجهد كبير.
تحياتي
maksofa
الحمد لله وربنا يدم الانتصارات
تحياتي
appy
متفق معاك طبعا وان المفروض نعمل الصح ونبعد عن الغلط بس الحكاية مش المفروض ايه الحكاية ان الواقع غير كده وذي ماكنت بقول للأخ الشنكوتي الكبير ان الصح في العادة بيكون صعب على الناس.
تحياتي
ازيك يا يحيى يا رب تكون بخير
انا لحد دلوقتى عايزه اقولك ان الناس اللى حواليا كلهم مش فاهماهم حتى اللى عايشه معاهم من يوم ماا تولدت كل شويه يقولوا حاجحه شكل ده برضه ف صحابلى يعنى لما اطلب مشوره واحده ف حاجه عشان اعملها و تنصحنى وكده وبعد كده يتكرر نفس الموقف معاها و تتصرف تصرف تانى
كمان والدى كان مسافر بقاله فتره الوقت اللى كان مسافره ده عرفت فى ناس كتيير واكتشفت انهم بيعرفوا بابا عشان مصلحه مش اكتر ناس كنت ماكنتش متوقعه انهم يبقوا كده لما اطلب منهم حاجه يعنى الناس بتبان ف وقت الشده بصراحه
موضوع جميل شكرا
--------------------------
كنت سمعت فى لقاء للشيخ على جمعة ان الانسان عند مولده بتكون فطرته هى الخير
ومعنى كده ان مفروض ما يكونش فيه اشرار .. لان فطرتنا هى الخير
بس للاسف المجتمع والاسرة بتحول هذه السمات الفطرية الى فطريات
يعنى بكتريا وتخلف
وبقت السمة السائدة هى الفصيلة الحيوانية واتعدمت اى سمات انسانية من رحمة ونخوة وعدل وحاجات كتيير
كل واحدة فيهم كفيلة انها تحل مشكلة 70 مليون بنى ادم
ادعى ربنا بقى مصر تكسب كوت ديفوار واحد صفر على الاقل :)
تحييياتى
السلام عليكم :بص يا استاذ يحيى انا والله ما عارفه اقول ايه يعنى فعلا المفروض ان الحياء دى فطرة وان الست تدارى جسمها وتحافظ عليه ده فى ايام الجاهليه الملكه بلفيس اللى كانت هى وقومها بيعبدوا الشمس وجت تقابل سيدنا سليمان كانت لابسه لبس طويل ومحترم ,انما الظاهر يا يحيى اننا بنعيش عصر المشى بالمقلوب يعنى الفطرة بيكون عادات وممكن كمان تكون عادات قديمه ومش ليها لازمه تتنفذ طبعا ده من وجهه نظر ناس انما فيه ناس تانيه هيفضل عندهم الاخلاق والنخوه والضمير ودى حاجات مستحيل تنتهى من امه محمد حبيبنا قال :سيظل الخير فى امتى الى يوم يبعثون .صدق رسول الله وخير ختامى كلام رسولى واسفه لانى نى طولت سلام حنين القلب
nefertiti
أخر كلمه انت قولتيها هي اللي بقالها فترة موجوده في تفكير وهي ان معادن الناس بتظهر في وقت الشدائد زي ما الحكمه بتقول. بس برده ده يرجعني لحاجة مهمة وهي ان الفطرة بتاعة الناس الطيبة والصافية والطاهرة ممكن تتغير بسبب الظروف والعوامل المحيطة بينا وبتظهر بس في حالة الشدائد
تحياتي
بنوته من وسط البلد
اولا الحمد لله مصر سبت كوت دي فوار مش واحد لأ أربعه ، ثانياً انا متفق معاكي في الرأي ان الانسان أصله الخير والمجتمع والبيئة المحيطة هي اللي بتغيره
بس برده المعدن النفيس والاصيل مش بيتغير .... ومدام معظم الناس بتتغير يبقى للأسف معظمهم مش أصلهم نفيس
تحياتي
حنين القلب
متفق مع رائيك خصوصا وان الناس الطيبة بتظهر في مواقف مختلفة
تحياتي
كلامك وموضوعك عجبنىوشدنى كتير لكن اللى ممكن اقولهولك "ان لم تستحى فافعل ما شئت"تحياتى على الموضوع الرائع
والله يا حاج يحى واضح إنه
بقالك (فطره) مش متابع الحركه الفنيه
لأن يا باشا من (فطره) طوييييله باين إنه المعادله إختلت على رأى الدكتور مجلى بتاع سنبل
طيب ايه بقا؟؟؟
مفيش بوست جديد؟
سلاماتى
لى لى
الحياء والخجل والغيره والنخوه والرجوله
الحاجات دي فعلا بالفطره السليمه اتخلقنا بيها
لكن بتاثير البيت والغيط وفي ظل غياب المدرسه والجامع علت الفطره الفطريات والعفن حتى تآكلت وغابت عند كثير من الناس ربنا يحفظنا
تحياتي ليك
واخيرا وبعد طول انتظار
كتاب يوميات اتنين مخطوبين نزل يا رجاله في المكتبات والمحلات
متوافر بمكتبة عمر بوك ستور
مكتبة مدبولى
الديوان بالزمالك
مكتبة ساقية الصاوى
وكمان حفل توقيع في: عمر بوك ستور
15 شارع طلعت حرب فوق مطعم فلفله ( عند محطة مترو السادات
من الساعه 6 مساء الى الساعه 9 مساء
وذلك يوم الجمعه الموافق 22 فبراير 2008
وقناة OTV هتيجي تصور حفل توقيع الكتاب
والدعوه عامه وهنبقى لمه
تعالوا شرفونا واحضروا معانا اللحظه دي
كلكم مدعوين
يحي هات هبه ويوسف وتعالوا
انت فنان ومراتك بتكتب
عايز اتفشخر بيكم في الحفله
تعالى بقى ونورني
سلاااااااااااااام
gannah
معاي حق طبعاً ، بس اللي انا مستغربله هو ان اللي مبوش يستحوا كتتتتتتتتتتتير قوي
تحياتي
الدرويش المرووش
يا باشا متابع والله والحاجات دي الواحد بيشوفها وبيتكعبل فيها في كل حته في البلد دي
تحياتي
لي لي
يا اخت لي لي انت اساسا معلقتيش على الموضوع ده ، وعلى العموم أن شاء الله هكتب حاجة عن قريب بس الشغل يخف شويه ، أدعيلي
تحياتي
أوشه
معاكي حق يا استاذة بس تفتكري الحل ايه ؟! وممكن نعمل ايه عشان نبقى أحسن؟
تحياتي
الشنكوتي الكبير
الف مبروك على الكتاب وربنا يكرمك في باقي أمورك كلها ، وان شاء الله ربنا يقدم اللي فيه الخير
تحياتي
Post a Comment