نظرت في الملكوت كتير وانشغلت
وبكل كلمة ليه ؟ وعشان ايه ؟ سألت
أسأل سؤال .. الرد يرجع سؤال
وأخرج وحيرتي أشد مما دخلت
عجبي !!
خرج أبن أدم من العدم قلت: ياه
رجع أبن أدم للعدم قلت: ياه
تراب بيحيا .. وحي بيصير تراب
الأصل هو الموت والا الحياة ؟
عجبي!!
ضريح رخام فيه السعيد اندفن
وحفره فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن
عجبي!!
والكون ده كيف موجود من غير حدود
وفيع عقارب ليه وتعابين ودود
عالم مجرب فات وقال سلامات
ده ياما فيه سؤلات من غير ردود
عجبي!!
كان فيه زمان سحلية طول فرسخين
كهفين عيونها وخشمتها بربخين
ماتت. لكن الرعب لم عمره مات
مع إنه فات بدل التاريخ تاريخين
عجبي!!
أحب أعيش ولو أعيش في الغابات
أصحى كما لودتني أمي وابات
طائر .. حوان .. حشرة .. بس أعيش
محلا الحياة .. حتى في هيئة نبات
عجبي!!
عجبتني كلمة من كلام الورق
النور شرق من بين حرفها وبرق
حبيت أشيلها في قلبي .. قالت حرام
ده انا كل قلب دخلت فيه اتحرق
عجبي!!
قالوا الشقيق بيمص دم الشقيق
والناس ما هياش ناس بحق وحقيق
قلبي رميته وجبت غيره حجر
داب الحجر .. ورجعت قلبي رقيق
عجبي!!
يوم قلت آه .. سمعوني قالوا فسد
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبي!!
دخل الربيع يضحك لقاني حزين
نده الربيع على إسمي لم قلت مين
حط الربيع أزهاره جنبي وراح
وأيش تعمل الأزهار للميتين
عجبي!!
مهبوش بخربوش الألم والضياع
قلبي ومنزوع م الضلوع أنتزاع
يا مرايتي يا اللي بترسمي ضحكتي
يا هلتري ده وش والا قناع
عجبي!!
حبيت .. لكن حب من غير حنان
وصاحبت لكن صحبه مالهاش أمان
رحت لحكيم واكتر لقيت بلوتي
إن اللي جوه القلب مش ع اللسان
عجبي!!
ليه يا حببتي ما بينا دايماً سفر
ده البعد ذنب كبير لا يغتفر
ليه يا حبيبتي ما بينا دايماً بحور
أعدي بحر الاقي غيره اتحفر
عجبي!!
ورا كل شباك ألف عين مفتوحين
وانا وانتي ماشيين يا غرامي الحزين
لو التصقنا نموت بضربة حجر
ولو افترقنا نموت متحسرين
عجبي!!
نوح راح لحاله والطوفان استمر
مركبنا تايهة لسه مش لاقية بر
آه من الطوفان وآهين يا بر الأمان
إزاي تبان والدنيا غرقانه شر
عجبي!!
على رجلي دم .. نظرت له ما احتملت
على أيدي دم .. سألت: ليه؟ لم وصلت
على كتفي دم .. وحتى على رأسي دم
أنا كلي دم .. قتلت؟ والا اتقتلت؟
عجبي!!
أنا كل يوم أسمع .. فلان عذبوه
أسرح في بغداد والجزائر واتوه
ما اعجبش م اللي يطيق بجسمه العذاب
واعجب من اللي يطيق يعذب أخوه
عجبي!!
23 comments:
اخترت رباعيات
من أجمل ما كتب جاهين
أحييك على اختيارك
ورمضان كريم
ما شاء الله
مختارات رائعة
اغلبهم قريتهم قبل كدة بس اللي اول مرة اقراها واثرت فيا جدا جدا
هي دي
يوم قلت آه .. سمعوني قالوا فسد
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
حقيقي قلبي اتهز
بارك الله فيك
في انتظار المزيد
ممكن تسمع الجزء دة بصوت وجية عزيز
رائع
http://www.wagihaziz.com/
princess dodo
شكرا جدا ، وفعلا الرباعيات دي جميلة بس فيه حاجات تانيه كتتتتتير جميله قوي برده بس بصراحة تعبت من الكتابة.
الله أكرم
تحياتي
shahy
على فكرة في حاجات تانيه كتتير كويسه برده ومدام انتي مهتمه كده بالحاجات الجامده دي زي عزيز وجيه ممكن أعملك سي دي للرباعيات بصوت سيد مكاوي واخلي (دوبه توصلهولك) ومعرفش ليكي في الشيخ امام واحمد منيب ولا لأ؟ لو بتحبيهم ممكن اسمعك ليهم حاجات كويسه قوي
تحياتي
الله يكرمك
انا طبعا ليا في الشيخ امام وعندي مجموعة شرايط لية وعندي جزء من الرباعيات بصوت علي الحجار وصلاح جاهين لكن مسمعتهاش قبل كدة بصوت سيد مكاوي وهايبقى كرم كبير منك لو سمعتهالي
واحمدمنيب دة معرفهوش بصراحة بس هو لو حلو احب اعرفة
ومش هانسى شكر ساعي البريد ام يوسف اللي هاتوصلي السي دي
جزاكم الله كل خير
سلام عليكم
بجد مختارات تحفة
وفي حاجات عجبتني قوييييييييي
كل سنة وانت طيب
سلام
جميلة قوي الرباعيات دي يا استاذ يحي شكلك هتخليني اهتم بعمنا صلاح بس انا برضه بموت في نزار تحياتي ليك وليوسف ولهبة
my hopes
الحمد لله ان المختارات دي عجبتك.
كل سنه وانت طيبة
تحياتي
قلوب حائرة
عمنا صلاح جاهين فعلا من أحسن الشعراء اللي جم مصر وليهم فلسفة خاصة ووجهة نظر في الحياة وطبعاً نزار مفيش زيوه.
تحياتي
جميل قوي الأبيات اللي انت اخترتها دي برافو عليك يا يحي احييك بجد
وكل سنه وانت طيب بس انا عايز افهم انا قعدت ادخل عندك الاقيك مش كاتب حاجه ولما غبت شويه صغيرين الاقيك كاتب بوستين وانا متأخر كده عموما ربنا يوفقك
تحياتي
سلااااااااااااااااام
كل سنه وانت طيب سلملى على يوسف وهبه
سلام
الشنكوتي الكبير
هي الدنيا كده كل ما تتابع حاجة متحصلش ولما تنفضلها تحصل ... دنيا بقى
تحياتي
nefertiti
وانت طيبة
تحياتي
النهارده يوم لذيذ
وقعت في أكثر من مدونة جميلة
منهم مدونة حضرتك
أما صلاح جاهين بقي ..
فمش عارف أقول فيه أيه
!! ده صلاح جاهين
على باب الله
شكرا جداً واتمنى ان تتكرر الزيارة
تحياتي
وعجبى
هو فى دلوقتى ذى صلاح جاهين
رقه وطيبه ثوره وعنف حنان وتفاؤل حزن ودموع محبه وخوف
فتحت شباكى لشمس الصباح
مدخلش منه غير عويل الرياح
وفتحت قلبى عشان أبوح بالألم
مخرجش منه غير محبه وسماح
انا بحبه قوى واختياراتك جميله جدا
أحييك
شيماء:)
ادعوك لزيارة مدونتي والاطلاع علي قصيدة مبارك يا من ذا الذي في مصر الجديده
شكراا
همسات دافئة
فعلا صلاح جاهين من أبدع الشعراء والفلاسفة اللي الواحد بيحترمهم ويقدرهم.
تحياتي
nourhetler
هزرو المدونة حالا وهقول رأي هناك
سلام
و بحبك وحشتينى
"مصر هية امى..نيلها هو دمى...شمسها فى سمارى ..دمها فى ملامحى...حتى لون قمحى ..لون نيلك يا مصر...مصر ...مصر" دى كانت كلمات الاغنية التى تغنت بها المطربة عفاف راضى من زمان قوى و اتربينا عليها...اتربينا على ان مصر هية امى...غنيناها فى المدرسة فى الابتدائى فى حفلات المدرسة و قولنا مصر هية امى ..و انا بدورى بقولك يا سيد عمر افندى...من هنا و رايح (مصر هية امك) و لازم تفهم ده كويس.
تابع باقى المقال على موقع عمر افندى
www.omarafandy.com
إنه جاهين
فبأي تعليق نتكلم عنه
رحمه الله
وأحسنت أخي في اختياراتك
salwa
شكرا ومتفق معكي جداً
Post a Comment